Heyetêka eskerî ya Amerîka Anqara de semedê meseleya “herêma asayişine” îdarekaranê Tirkîya dir kom bîy.

Wezaretîya Pawitişî ya Tirkîya aşkere kerd ke, ewro serê sbayî  heyetêka eskerî ya Amerîka resaya Anqara. Na heyete dir semedê meseleya “herêma arame” pêvînayîş dest pêkerd.

Gorê beyanatê Wezaretîya Pawitişî ya Tirkîya ra, pêvînayîş saete 10:00 de dest pêkerdo û heta nika zî dewam keno.

Na heyeta Amerîka xeylê wexto ke yena Tirkîya. Seke yeno zanayîş Tirkîya wazena Rojavayê Kurdistanî îşgal biko û sey Efrîn dest rono pêruna cayanê Rojavayê Kurdistanî ser.

Xeylê wexto ke Serekomarê Tirkîya Receb Tayîp Erdogan Rojavayê Kurdstanî tehdîd keno û vano; ma do operasyona eskerî bike.

Tirkîya vana; Gere uca de herêma asayişine bêra ronayîş, a herêma gorê zerrîya ma bo û eke wina nêbo ma do hêrişê Rojavayê Kurdistanî bike. La Amerîka zî nê waştişê Tirkîya qebûl nêkena.