Wezîrê Veguhestin û Gihandinê yê Herêma Kurdistanê Ano Cewher di derbarê rêya trênê de axivî û diyar kir, ji bendera Faw heta deriyê sînorî yê Îbrahîm Xelîl, projeyeke mezin e û wê sûdê bide aboriya Kurdistan û Iraqê.
Ano Cewher eşkere kiriye: “Em li Bexdayê bi Rêveberiya Rêya Trênê ya Iraqê û Rêya Trênê ya Tirkiyê re civiyan, em weke Wezareta Veguhestinê ya Herêma Kurdistanê, me nêrînên xwe ji bo rêya trênê eşkere kir.”
Cewher da zanîn: “Me plana xwe da her du aliyên Iraqî û Tirkiyê, ku divê rêya trênê ji Kerkûkê were Hewlêrê û ji vir biçe Mûsilê û ji wir jî biçe parêzgeha Duhokê heta Zaxo û Deriyê Sînorî yê Îbrahîm Xelîl, ji wir jî nava axa Tirkiyê û bi rêya Nisêbînê heta digihêje Ewropayê.”
Wezîrê Veguhestinê da zanîn; ev proje ji bo siberoja aboriya Kurdistan, Iraq û Tirkiyê gelek girîng e, ev ji bo welatên cîran û welatên Kebdavê jî pêgeheke wê ya girîng heye, lêkolînek heye ku kelûpelên ji rojhilat tên û diçin Ewropayê, niha di 18 rojan de digihîjin, lê belê bi çêkirina vê xetê, di 12 rojan de digihîjin û lêçûnên wê jî kêmtir dibin.
Herî dawî Ano Cewher destnîşan kir; çêkirina vê xetê ji bo hemû wan welatan bi sûd e, tevî wê jî li Herêma Kurdistanê projeyeke xeta navxwe heye, ku ji Silêmaniyê ber bi Hewlêrê û bajarên din ên Herêma Kurdistanê dirêj dibe.