Seroka Fraksiyona PDKê ya Civata Nûnerên Îraqê radigehîne, “Ji ber hinardenekirina petrola Herêma Kurdistanê, tenê di sala borî de bi bihayê 20 milyar dolaran zirar gehiştiye Hikûmeta Federalî.”
Seroka Fraksiyona Partiya Demokrat a Kurdistanê (PDK) ya Civata Nûnerên Îraqê Viyan Sebrî îro (Pêncşem, 06.03.2025) ji K24ê re got, “Heta niha Îraqê gerentî bi Apikurê nedaye, tevî ku civîn erênî bûn, lê negehiştin lihevkirina dawiyê.”
Viyan Sebrî herwesa got, “Hikûmeta Herêma Kurdistanê pabendî qanûna budceyê bû û pabendiya xwe bi hinardekirina petrolê bi rêya kompaniya SOMOyê jî diyar kiriye.”
Navbirî amaje jî da, “Ji ber hinardenekirina petrola Herêma Kurdistanê, tenê di sala borî de bi bihayê 20 milyar dolaran zirar gehiştiye Hikûmeta Federalî.” Herwesa daxwaz ji Îraqê kir ku ji bo pêdivîtiya navxweyî, pişka petrolê ya Herêma Kurdistanê zêde bike.
Seroka Fraksiyona PDKê di derheqa mûçeyên fermanberên Herêma Kurdistanê de jî amaje da, “Berî du heftiyan lîsta navên fermanberên Herêma Kurdistanê ji Wezareta Darayî ya Îraqê re hatiye şandin.”