Li gor TUIKê îsal ji bo %32.6ê nifûsa giştî ya Tirkiyê û ji her 2 zarokan yek jî ku dike 9.4 milyon zarok metirsiya birçîbûnê heye.
Saziya Amaran a Tirkiyê (TUIK) derbarê lêkolîna “Zarok, Hejarî û Jiyan” de amarên 2023an belav kirin.
Li gor amarên TUIKê îsal ji bo 9.4 milyon zarokan metirsiya birçîbûnê heye û ev metirsî ji bo nifûsa giştî jî %32.6 e. Herwiha rêjeya zarokên ku metirsiya birçîbûnê li ser wan heye gehiştiye %42.7 û temenê piraniya wan zarokan jî 0-17an de ye.
Li gor wan amaran li seranserê Tirkiyê ji her 2 zarokan yek metirsiya birçîbûnê li ser heye.
Ligel vê yekê li gor amarên Wezareta Perwerdê ya Tirkiyê (MEB) li seranserê Tirkiyê zarokên ku temenê wan di navbera 0-17 salan de ye 22 milyon û 578 hezar û 378 zarok in û %51.3 kur û %48.7 jî zarokên keç in. Li gor amarên fermî ji ber hejariyê %76.2 zarokên kur û %79.6 zarokên keç nikarîne perwerdeya xwe bidawî bikin. Herwiha li dibistanên seretayî û navîn jî ji her 100 zarokan 9.1ê wan dest ji dibistanê berdane.