Li gor Saziya Amarên Tirkiyê (TUIK), li Tirkiyê sala 2021ê bi tevahî 58 hezar û 576 xanî bo welatiyên biyanî hatin firotin. Welatiyên biyanî meha Kanûna 2021ê jî 7 hezar û 841 xanî li Tirkiyê kirîne û li gor heman meha sala 2020ê firotina xaniyan bo biyaniyan %77.1 zêde bûye.
TUIKê amarên firotina xaniyan bo biyaniyan eşkere kir. Daketina nirxê lîreyê Tirkî li hember pereyên biyanî û li beramber 250 hezar dolaran mafê wergirtina welatîbûna Tirkiyê, rêjeya firotina xaniyan bo biyaniyan zêde kir.
Li Tirkiyê sala 2021ê bi tevahî 58 hezar û 576 xanî bo welatiyên biyanî hatin firotin. Sala 2020ê 40 hezar û 812 xanî bo biyaniyan hatibûn firotin. Bi vî awayî sala 2021ê firotina xaniyan bo biyaniyan %43.5 zêde bû.
Bi taybetî piştî lîreyê Tirkî di meha Kanûna 2021an de bi awayekî tund ji %50î zêdetir nirxê xwe ji dest da, biyaniyan zêdetir xanî kirîn. Welatiyên biyanî meha Kanûna 2021ê 7 hezar û 841 xanî li Tirkiyê kirîne û li gor heman meha sala 2020ê firotina xaniyan bo biyaniyan %77.1 zêde bû. Welatiyên biyanî herî zêde li bajarê geştyariyê Antalyayê, xanî kirîne. Biyaniyan sala 2021ê li Antalyayê 12 hezar û 384 xanî kirîne.
Herwiha sala 2021ê, herî zêde welatiyên Îran, Herêma Kurdistanê, Iraq, Rûsya, Afxanîstan û Almanyayê xanî kirîne. Welatiyên Îranê, 10 hezar û 56 xanî, welatiyên Herêma Kurdistanê û Iraqê 8 hezar û 661 xanî, welatê Rûsyayê 5 hezar û 379 xanî, welatiyên Afxanîstanê 2 hezar û 762 xanî û welatiyên Almanyayê 2 hezar û 358 xanî kirîne.
Li gor amarên Banka Navendî, sala 2021ê bir rêya firotina xaniyan bo biyaniyan 5 milyar û 157 milyon dolar bo Tirkiyê hatine veguhestin.