Çend gundên ser bi Şehba, nahyeya Şera û rojhilatê Babê ji şeva derbasbûy ve heya vê sibehê ji aliyê Artêşa Tirkiyê û komên çekdar ve bi dijwarî hatin topbarankirin.
Çavkaniyên xwecihî belav kirine ku Artêşa Tirkiyê û grûpên çekdar ên ser bi wî welatî ve, 15 gundên Rojavayê Kurdistanê û Bakurê Rojhilatê Sûriyê topbaran kirine.
Gundên Xirbet Şeale, Um el-Hoş, Medyûne, Tanî, Til Eneb, Nêrebiyê, Cebel Nayif, Simoqiyê û Bêlûniye û Minex û Bendava Şehba bi dijwarî hatine topbarankirin.
Li gor heman çavkaniyan, 17 top tenê li gundê Xirbet Şeale yê ser bi herêma Şehbayê ve ketine.
Li gundê Um el-Hoşê jî ajelên xelkê ketine ber topbaranê û çend serî pez ji nav çûne.
Artêşa Tirkiyê û komên çekdar herwiha gundên Mereinaz, Qemiyê, Malikiyê û Şiwarixê li gundewarê nahyeya Şera ya Erfînê jî topbaran kirine.
Li rojhilatê Babê jî, bi dronekê êrîşî gundê Biwêhic hatiye kirin û ziyan gihiştiye mal û zeviyên xelkê.