Cayê mendişî yê leşkeran o ke Terteleyê Dêrsimî de sey qerargehêkê merkezîyî şuxilîyabi, bi nameyê 'Muzeyê Tuncelî' ame akerdene. Dêrsimijan medyaya dîjîtale de vera muzeyî nêrazîbîyayîşê xo mojna.
Cayê mendişî yê leşkeran o ke Terteleyê Dêrsimî de sey qerargehêkê merkezîyî şuxilîyabi, bi nameyê 'Muzeyê Tuncelî' ame akerdene. Terteleyê Dêrsimî ra dima no qerargeh sey lojman şuxilîya. Serra 2015î de zî bîna sey 'Muzeyê Tuncelî' restore bîye.
Dezgehanê sîvîlan ê Dêrsimî waştbi ke wa tîya se merkezê vîrî bêro şuxulnayene la no waştiş amebi redkerdene. Bado ke vizêr akerdişê nê muzeyî ame kerdene, dêrsimijan medyaya dîjîtale de vera muzeyî bi tewirêkê xurtî nêrazîbîyayîşê xo mojna:
Merkezê Cigêrayîşanê Dêrsimî (DAM): ''Nameyê Dêrsimî serra 1935î de sey 'Tuncelî' vurîya. Bêtexamulîya vera nameyê Dêrsimî ewro zî dewam kena. Kişlaya ke wextê qirkerdişî de sey qerargehê merkezî şuxilîya ewro bîyo Muzeyê Tuncelî.''
Hunermend Ferhat Tunç: ''Muze de derheqê terteleyî de qet yew detay, têrîbîyayîş çin o. Tertele ame meşrûkerdene.''
Nuştox Nesîmî Aday: ''Ganî Dêrsim de verî muzeyê 'terteleyî' bêro akerdene. Naa kişla şahîda Terteleyê 1938î ya.''
Avûkat Bariş Yildirim: ''Nameyê Tuncelî nameyê Terteleyê 1938î yo. Ma nê nameyî qebul nêkenê. Herinda ke tarîxî reyde bêrê têrî sey dewamê qirkerdişî bînayê winasênî virazîyenê.''