Sekreterê Bereya Yekgirtî ya Kurd Siyaweş Heyatî û 3 çalakvanên Yarsan ji aliyê hêzên ewlekariyê yên Îranê ve li nzêîk bajarê Kirmaşanê yê Rojhilatê Kurdistanê hatin desteserkirin.
Komeleya Şêwirmendiya Çalakvanên Sivîl ên Yarsan ragihand, şeva bihorî 7 endamên wan li ser rêya Bêstûnê dema ji bajarê Sehneyê vedigeriyan Kirmaşanê, di xaleke pişkinînê de ji aliyê hêzên emnî yên Îranê ve hatin desteserkirin.
Li gor agahiyan, Siyaweş Heyatî û çalakvanên din ên Yarsan ji bo dîtina komek şopînerên olî yên Yarsan ku ji ber xwepêşandanên wê dawiyê hatibûn desteserkirin û ji girtîgehê hatibûn berdan, çûbûne bajarê Sehneyê.
Hatiye ragihandin ku 3 ji wan kesên desteserkirî piştî 2 saetan serbest hatin berdan, lê Sekreterê Bereya Yekgirtî ya Kurd Siyaweş Hayatî jî di nav de 4 kes hêj desteserkirî ne û nehatine berdan.
Siyaweş Heyatî roja 22ê Îlona 2022an beşdarî merasîma oxirkirina cenazeyê welatiya Kurd Mîno Mecîdî li bajarokê Qesra Şîrîn bibû, û ji ber gotara di merasima veşartina wê jina Kurd de hatibû desteserkirin.
Mîno Mecîdî roja Sêşemê 20ê Îlonê di xwepêşandanên taxa Buhara Nû ya bajarê Şahabad a Kirmaşanê de ji aliyê hêzên ewlehiyê yên Îranê ve hatibû kuştin.
Dadgeha Şahabadê di 22ê Mijdara 2022an de cezayê salek zindanê bi ser Siyaweş Heyatî de sepandibû.
Li gor zanyariyan, ji bilî Siyaweş Heyatî, Seyid Emîn Ebasî, Kakî Ferzad Elmasî û Seyid Sirûş Ebasî jî hatine desteserkirin.
ÇAVKANÎ: RÛDAW