Li paytexta Brîtanya Londonê ji aliyê Centre for Kurdish Progress (CKP) li Parlamentoya Brîtanyayê, ji bo rêzgirtina 50 saliya hûnera hûnermendê navdar ê Kurdistanê Şivan Perwer bernameyek hate lidarxistin.
Di bernameya ku hejmarek parlamenterên Brîtanî û civaka Kurd beşdarî kirin de, xelata Rûmetê bo hûnera Şivan Perwer pêşkeşî wî hate kirin. Siyasetmedarê Bakurê Kurdistanê Osman Baydemîr jî dema pêşkeşkirina xelata rêzgirtinê amadehî kir.
Şeva rêzgirtina hûnermendê Kurd Şivan Perwer şeva borî li Parlamentoya Brîtanya hate lidarxistin ku beriya wê jî 1ê Hezîranê li Dominion Centre ya li bakurê Londonê konserek dabû.
Li ser sazkirina vê bernameya taybet CKP ragihandibû ku, “Em gelek serbilind in ku vê xelatê didin Şivan Perwer, kesayetiyek efsanewî ku muzîk û peyamên wî bo gelek nifşên Kurd û dostên Kurdistanê li çar aliyê cîhanê belav bûye. Dilsoziya Şivan a ji bo çand, zimanê Kurdî û têkoşîna ji bo edaletê bi rêya hunerê ne kêmî tiştekî bêhempa ye. Ev çalakî ne tenê rêzgirtinek ji bo karen wî yên bênavber lê di heman demê de ji bo rola wî ya daîmî wekî dengek ji bo gelê Kurd û çirayek hêviyê di demên dijwar de”.