"Sala 2021ê ji bo gelê Kurdistanê û ji bo hemû mirovahîyê, wek sala 2020ê sala kareseta Pandemîya Covîd-19ê bû.
Me wek milet saleke din jî ya bi êş û xeman ve dagirtî li dûv xwe hişt.
Bi hêvî, daxwaz û bawerîya ku di sala 2022yê de,ev karesat û xeterîya Pandemîya Covîd-19ê bi dawî bê û hemû mirovahî ji vê belayê xelas bibin.
Bi hêvî, daxwaz û bawerîya ku di sala 2022yê de, bi hûnandin û geş kirina hişmendîya neteweyî û niştimanî, bi têgihîştineke ji dîroka xwe ders derxistinê , bi xurt kirin û geş kirina hêvîyên xwe, em li qada navnetewî de dostên xwe zêde, dijminên xwe kêm bikin.
Bi hêvî, daxwaz û bawerîya ku di sala 2022yê de bila fedakarî, dilsozî, biryardarî, xebat, nefsbiçûkî, rêz li hev girtin, lêgerîn û ava kirina hevkarî û tifaqên welatperwerane, bawerîya bi doza azadîyê bibe şirîk û rêbaza jîyana me ya şexsî, sîyasî, civatî, netewî.
Bi hêvî, daxwaz û bawerîya ku di sala 2022yê de li Bakurê Kurdistanê di nava potansîyela herî berfireh ya gelê Kurdistanê de li ser daxwazên acîl yên netewî, niştimanî hevkarî û tifaq bêne ava kirin,şer raweste û rêya xebat û çareserîya sîyasî, demokratîk, sivîl vebe. Û ev tifaq di azadîya Kurdistanê de bibe tifaqeke mayînde.
Bi hêvî, daxwaz û bawerîya ku di sala 2022yê de bi yekrêzîya hemû partîyên sîyasî yên li Başûrê Kurdistanê û bi piştgirî, hevkarî û alîkarîya hemû Kurdên cîhanê , destkeftîyên federe yên Herêma Kurdistanê bêne parastin; Kerkûk, Şingal û hemû navçeyên dagirkirî yên ku mijara madeya 140î ne, vegerin ser desthilatdarîya Parlamento û Hikûmeta Herêma Kurdistanê.
Bi hêvî, daxwaz û bawerîya ku di sala 2022yê de li Rojavayê Kurdistanê PYNK, ENKS û hemû partîyên Kurdan li ser îdareyeke hevbeş ya leşkerî, sîyasî, aborî, dîplomasî û îdarî li hev bikin, destkeftîyên heyî biparêzin, wek alîyekî rêya destkeftîyên netewî, demokratîk yên pêşdetir xurtir bikin.
Bi hêvî, daxwaz û bawerîya ku di sala 2022yê de ,li Rojhilatê Kurdistanê hemû partîyên netewî, niştimanî yekrêzîya xwe xurtir bikin û bi amadeyîyeke hîn organîzetir û xurtir ji guhertinên ku dikare rûbidin xwe amade bikin.
Bi hêvî, daxwaz û bawerîya ku sala 2022yê rêya azadîyê, rêya jîyaneke mirovane, demokratîk, adilane, aştîyane, wekhev ji gelê Kurdistanê û ji hemû mirovahîyê re veke.
Bi hêvî, daxwaz û bawerîya ku di sala 2022yê de xweşî, tenduristî û bextewarî bibe şirîkê jiyana me, bi hest û bîr û bawerîyên xwe yên netewî, niştimanî û mirovî ez sala nû ya gelê me yê li Kurdistanê û li her welatekî cîhanê û ya hemû mirovahiyê pîroz dikim."
31.12.2021
Mustafa Özçelik
Serokê Giştî yê PAKê