Serokê Herêma Kurdistanê Nêçîrvan Barzanî di çarçoveya Konferansa Ewlekariyê ya Munchenê de bi Serokkomarê Azerbaycanê Îlham Aliyev re civiya. Serokê Azerbaycanê, Nêçîrvan Barzanî vexwende Bakuyê û diyar kir ku ew dê hewl bidin li Hewlêrê konsulxaneyekê vekin.
Îro Şemiyê 18ê Sibata 2023an, di duyemîn roja Konferansa Ewlekariyê ya Munchenê ya Almanyayê de, Serokê Herêma Kurdistanê Nêçîrvan Barzanî bi Serokê Azerbaycanê Îlham Aliyev re civiya.
Serokatiya Herêma Kurdistanê li ser naveroka civînê got, “Her du aliyan daxwaza xwe ya hevbeş ji bo berfirekirina peywendiyên di navbera Herêma Kurdistanê û Komara Azerbaycanê de kirin ku bi awayekî zêdetir danûstandinên bazirganî û serdanên di navbera her du aliyan de pêş bikeve.”
Serokomarê Azerbaycanê Îlham Aliyev ragihand ku ew li ser vekirina konsulxaneya xwe ya li Hewlêrê dixebitin û bi fermî Nêçîrvan Barzanî vexwendiye ku serdana Bakuyê bike.