Kongreya 14emîn a Partiya Demokrat a Kurdistanê dê roja 3ê Mijdara 2022an li bajarê Duhokê dest pê dike.
Di meha Tebaxa 2022an de hilbijartina endamên kongreyê di nava organên Partiya Demokrat a Kurdistanê (PDK) dest pê kiribû ku mafê dengdanê ya zêdetirî 600 hezar endaman hebûn û ji nava wan 800 endam ji bo beşdariya di kongreya 14emîn a Partiya Demokrat a Kurdistanê (PDK) de hatin hilbijartin.
Ji bilî endamên hilbijartî, li gor peyrewên kongreyê, endamên Polîtburo û Serkirdayetiyê, bêyî dengdanê dibin endamên kongreyê û divê % 25 ji endamên kongreyê jin bin.
Li gor zanyariyên Kurdistan24ê, nêzîkî hezar kesî dê beşdarî 14emîn kongreya Partiya Demokrata Kurdistanê (PDK) bibin.
Kongreyên berê yên Partiya Demokrat a Kurdistanê (PDK):
- Kongreya Yekemîn: Roja 16ê Tebaxa 1946an li Bexdayê li mala Seîd Fehîm û bi amadebûna nêzîkî 70 delegeyan bi dizî hat lidarxistin.
- Kongreya Duyemîn: Di Adara sala 1951ê de li Bexdayê, li mala Elî Hemdî, bi amadebûna nêzîkî 30 nûneran hat lidarxistin.
- Kongreya Sêyem: Roja 26ê Çileya 1953an li Kerkûkê bi amadebûna nêzîkî 35–40 delegeyan hat lidarxistin.
- Kongreya Çarem: Roja 4 - 7ê Cotmeha sala 1959an de li Bexdayê, li mala Kaka Ziyad, bi serokatiya Mela Mistefa Barzanî hat lidarxistin.
- Kongreya Pêncemîn: Di Gulana 1960î de li bargehên PDKê li Bexdayê hat lidarxistin.
- Kongreya Şeşemîn: di destpêka Tîrmeha 1964an de li Qeledzê hat lidarxistin.
- Kongreya Heftem: 15ê Mijdara 1966an li Gelala hat lidarxistin.
- Kongreya Heştemîn: 1ê Tîrmeha 1970î de li Nawpirdanê bi amadebûna 488 delegeyan hat lidarxistin.
- Kongreya Nehem: Di 4ê Mijdara 1979ê de hat lidarxistin û tê de Mesûd Barzanî wek Serokê PDKê hat hilbijartin.
- Kongreya Dehemîn: Di navbera 2 - 12 Berçileya 1989an de li Mergewerê bi beşdariya 332 delegeyan pêk hat.
- Kongireya Yazdehemîn: Sala 1993an li Hewlêrê bi beşdariya 2176 nûneran hat girêdan.
- Kongreya Diwazdemîn: Di 6 - 14 Cotmeha 1999an de, li Hewlêrê bi beşdariya 1473 delegeyan hat lidarxistin.
- Kongireya Sêzdemîn: Di 11ê Berçileya 2010an de, li Hewlêrê bi beşdariya zêdetirî 1500 delegeyan hat lidarxistin.