Medyaya PKK ragihand ku Tevgera Şoreşger a Yekbûyî ya Gelan (HBDH) ku bi ser PKKê ve ye, bi daxuyaniyeke nivîskî eşkere kiriye ku boriya petrolê ya li navçeya Pazarcik a Mereşê bi teknîkeke taybet hatiye teqandin.
Di daxuyaniya ku berpirsiya teqîna xeta boriya petrolê hatiye ragihandin de tê gotn:
“Milîs û gerîlayên HBDH'ê her kêliyê û li her cihî hêza xwe ya çalakiyê birêxistin dike. Çalakiya me ya li Mereşê ji bo hilanîna tola gelên me yên bindest, çîna karker, kedkar, berxwedêrên li zindanan û tolhildana bi dehan şoreşgerên ji aliyê faşîstan ve hatin qetilkirin, pêk hatiye. Haya gerîlayên HBDH'ê ji her kiryarên faşîzma AKP-MHP'ê û hevkarên wê heye. Wê hesabê komkujiyên ku wan kirine bipirse û planên wan ên komkujiyan têk bibe. Ti hesab wê bêbersiv nemîne. Ji niha û pê ve bila bê zanîn; kî zilmê li gel bike, li şoreşgeran bixe, hewl bidin rûmeta kedkaran binpê bikin û yên piştgiriyê didin faşîzmê, wê gerîla û milîsên HBDH'ê li hemberî xwe bibînin.”
Boriya neftê ya Herêma Kurdistanê ku petrola Kurdistanê digehîne bendera Ceyhanê doh 18.01.2022 li taxa Narli ya navçeya Pazarcik a parêzgeha Mereşê hatibû teqandin. Îro 19ê Çile jî piştî çakkirina xeta boriyê veguhestina neftê ji nû ve hatibû destpêkirin.