Berdevkê AK Partiyê Omer Çelîk li ser hevdîtinên DEM Partiyê û Abdullah Ocalan axivî û got, “pêvajoya trafîka serdanan qediya, ya ku ji vir û şûn de tê çaverêkirin banga fesixkirina rêxistina terorê ye.”
Berdevkê AK Partiyê Omer Çelîk îşev li Navenda Giştî ya AK Partiyê di konferanseke rojnamegeriyê de axivî.
"Ev ne pêvajoya dan û standinê ye"
Omer Çelîk li ser hevdîtinên heyeta DEM Partiyê ya Îmraliyê û bendewariyên wan ji vê pêvajoyê got:
“Bi ti şêweyî ev ne pêvajoya bazarkirinê ye, bi ti şêweyî ne pêvajoya dan û standinê ye.
Wekî Tirkiyeyê di vê pêvajoyê de armanca yekem Tirkiyeyeke bê terror e.
Ya duyem jî astengkirin û tunekirina rêxistinên terorê ye.
Ev pêvajoya trafîka serdanan qediya. Ya ku ji vir û şûn de tê çaverêkirin banga derbarê tesfiyekirina rêxistina terorê de ye.
Di wê trafîka serdanan de jî me nêrîna xwe got, şandeya serdanker jî bi awayekî eşkere û vekirî çawa li pêvajoyê dinêrin bi me re par ve kir.
Me jî helwesta xwe ya derbarê xebatên dema bûrî hatîne kirin û vê demê de danî holê.
Piştî ev trafîka serdanan qediya xala ku em gihiştînê, divê demildest banga tasfiyekirina rêxistina terorê û danîna çekan çêbibe.
Min berê jî gotibû, bi ti şêweyî ev ne pêvajoya bazarkirinê ye, bi ti şêweyî ne pêvajoya dayîn û standinê û bi ti şêweyî ne ji wesfên bingehîn yên dewletê tawîz dayîn e.
Bi awayekî vekirî birêz serokkomarê me û birêz Devlet Bahçelî jî gotin armanc Tirkiyeyeke bê teror.”
“Xebatên Birêz Ocalan ên li ser pêvajoyê dewam dikin”
Heyeta DEM Partiyê ya ku ji Pervîn Buldan û Sirri Sureyya Onder pêk tê 22yê vê mehê ji bo hevdîtina bi Abdullah Ocalan re çûbû Girtîgeha Îmraliyê
Heyeta DEM Partiyê 23yê mehê daxuyaniyeke nivîskî belav kir û got, “Xebatên Birêz Ocalan ên li ser pêvajoyê dewam dikin.”