Di berdewamiya zext û êrişên ser partiyên endamê Encûmena Niştimaniya Kurdî ya li Sûriyê (ENKS) de, şeva bihorî 19ê Nîsanê Ofîsa Partiya Demokrata Kurdistan-Sûriye ya li bajarê Hesekê hat şewitandin. Di nava du rojan de ev sêyemîn ofîsa ser bi ENKSê ve ye ku li Rojavayê Kurdistanê tê şewitandin.
Endamê Polîtboruya PDK-Sê Beşar Emîn ji bajarê Hesekê ve ji Rûdawê re ragihand, şeva Sêşembê ofîsa partiya wan a li bajarê Hesekê yê Rojavayê Kurdistanê ji aliyê hin kesan ve hatiye şewitandin.
Beşar Emîn got, “derdora 10 kesên ser û çav nixumandî avêtine ser Ofîsa PDK-Sê ya li Hesekê û ew ofîs şewitandine.”
Şevek beriya wê di 18ê Nîsana 2022an du ofîsên din ên ser bi ENKSê û partiyên wê ve li Rojavayê Kurdistanê hatibûn şewitandin. Yek ji wan, Ofîsa Encûmena Xwecihî ya ENKSê li bajarê Dêrikê û ya din Ofîsa PDK-Sê ya li bajarê bû.
Rêveberiya Xweser û Asayişa Rêveberiya Xweser heta niha derbarê şewitandina ofîsên ENKSê de ti daxuyanî û zelalkirinek nedane.
Herwiha heta niha ti kesek ji ber êrişa ser ofîsên ser bi ENKSê ve û şewitandina wan nehatiye desteserkirin.
Berpirsên ENKSê dibêjin, rêxistina bi navê Ciwanên Şoreşger a ser bi Partiya Yekîtiya Demokratîk (PYD) ve berpirsyarê wan êrişan e.
Rûdaw