Neteweyên Yekbûyî (NY) diyar kir ku par zêdeyî 3 hezar koçber li Deryaya Navîn û Okyanûsa Atlantîk dema hewl didan xwe bigihînin Ewropayê canê xwe ji dest dane.
Roja Înê 29ê Nîsana 2022an Saziya Penaberan a Neteweyên Yekbûyî raporek li ser penaberan û koçberan weşand û diyar kir ku par 3 hezar 77 kesan dema hewl didan xwe bigihînin Ewropayê li Deryaya Navîn û Okyanûsa Atlantîkê niqûmî avê bûn û canê xwe ji dest dan.
Hat diyarkirin ku di sala 2020an de jî 1544 koçber li Deryaya Navîn û Okyanûsa Atlantîkê canê xwe ji dest dan.
Neteweyên Yekbûyî her wiha destnîşan kir ku ji 3 hezar û 77 kesan, hezar û 924 kes li ser rêyên Deryaya Navîn û hezar û 153 kesên din jî di Deryaya Navîn de dema ku ji Bakurê Afrîkayê dixwestin xwe bigihînin giravên peravê canê xwe ji dest dane.
Berdevka Saziya Penaberan a Neteweyên Yekbûyî Shabia Mantoo da xuyakirin ku piraniya koçberan ji bo derbasbûnê keştiyên gelekî xirab bi kar anîne û ev yek bûye sedem ku gelek caran keştî niqûm bibin û bibin sedema mirina koçberan.
Li gorî ajansa NYyê sala borî 53 hezar û 323 koçber bi keştiyan gihîştine Îtalyayê û ev rêje ji sala borî ji sedî 83 zêdetir e. Her wiha di sala 2021an de 23 hezar û 42 kes xwe gihîştandin giravên peravê.