Li navçeya Cizîrê ser bi parêzgeha Şirnexê ya Bakurê Kurdistanê, welatî li dijî girankirina bihayên elektrîkê derketin kolanan û nerazîbûn nîşan dan.
Li Tirkiye û Bakurê Kurdistanê ji ber zêdekirina bac û giranbûna nirxê xorak, enerjî û kel û pelên din çend roj in nerazîbûn û xwepêşandan çêdibin, lê hikûmet heta niha ji biryara zêdekirina bihayan paş de gav neavêtiye.
Piştî bajarên wek Bazîd, Qoser û Şirnexê îro jî li Cizîrê welatî daketin kolanan û li dijî bihayên elektrîkê xwepêşandan kirin. Bi sedan kes bi diruşmên, “Rêvebirî îstîfa” û “Bicehime DEDAŞ” meşiyan.
Welatiyan xwestin ber bi avahiya kompanya elektrîkê DEDAŞê ve bimeşin, lê polîsan rê nedan. Tevî midaxeleya polîsan bi sedan kes ji Kolana Nexweşxaneya Kevin heta Kolana Orhan Dogan meşiyan û xwepêşandana xwe bi dawî kirin.