Serokê Herêma Kurdistanê Nêçîrvan Barzanî, îro 23yê Çile li Hewlêrê pêşwaziya Wezîrê Dewletê li Wezareta Derve ya Almanyayê û Berpirsê Birêxistinkirina Wezareta Derve ya Almanyayê Tobias Lindner kir.
Serokatiya Herêma Kurdistanê ragihand, “Di hevdîtinê de berdewamkirina pêwendiyên Almanyayê bi Iraq û Herêma Kurdistanê re, pêwendiyên Hewlêr û Bexdayê, hilbijartinên Parlamena Kurdistanê, rewşa Iraq û Herêma Kurdistanê, guhertinên Sûriyeyê û geşedanên dawî yên Rojhilata Navîn hatin gengeşekirin.”
Serokê Herêma Kurdistanê spasiya alîkarî û piştgiriya berdewam a Almanyayê di warên leşkerî, siyasî û mirovî de ji bo Iraq û Herêma Kurdistanê kir û herwiha tekezî li ser daxwaza Herêma Kurdistanê ji bo berfirehkirina alîkariyên hevpar bi Almanyayê re di hemû waran de kir.
Tobias Lindner, pesnê proseya hilbijartinên Parlamena Kurdistanê û rêjeya bilind a tevlîbûna welatiyan di hilbijartinan de da û li ser hewlên pêkanîna kabîneya nû ya Hikûmeta Herêma Kurdistanê bi Nêçîrvan Barzanî re dîtin û nerînên xwe parve kirin.
Herwiha her du aliyan girîngiya parastina aramî, seqamgirî û alîkariya hemû aliyan ji bo dûrxistina aloziyan a herêmê anîn ziman.