Serokwezîrê Herêma Kurdistanê Mesrûr Barzanî, daxwaza Rêberê PKKê yê zîndanîkirî Abdullah Ocalan a ji bo hevdîtina bi Serok Mesûd Barzanî re, wek "xaleke erênî" nirxand. Herwiha tekez kir, ew ji bo alîkariya proseya nû ya aştiyê çi ji destê wan bê, dê bikin.
Serokwezîrê Herêma Kurdistanê Mesrûr Barzanî, îro Çarşemê, 25.06.2025, di konferanseke rojnamevanî de, helwesta Herêma Kurdistanê ya li ser proseya nû ya aştiyê û daxwaza dawî ya Abdullah Ocalan eşkere kir.
Mesrûr Barzanî amaje bi wê yekê kir, rola Serok Barzanî û Herêma Kurdistanê her dem ji bo serxistina proseya aştiyê û pêkanîna aştiyeke mayînde bûye.
Derbarê daxwaza Rêberê Partiya Karkerên Kurdistanê (PKK) yê girtî Abdullah Ocalan a ji bo hevdîtina bi Serok Barzanî re, Serokwezîr Barzanî got: "Em vê yekê wek xaleke erênî dibînin. Serok Barzanî her tim hewl daye ku alozî nemînin û pirsgirêk bi rêya diyalogê werin çareserkirin."
Serokwezîr di dawiya axaftina xwe de li ser heman mijarê tekez kir û got: "Em piştrast in ku ji bo alîkarîkirina proseyê, çi ji destê me bê em ê bikin."