Malbatên 9 ciwanên ji Rojhilatê Kurdistanê ku dema dixwestin derbasî Ewropayê bibin ji aliyê hêzên Tirkiyê ve radestî komeke çekdarên cîhadî ya Sûriyê hatine kirin, careke din li ber deriyê balyozxaneya Tehranê ya Tirkiyê civiyan û daxwaza berdana zarokên xwe kirin.
Li gorî zanyariyan, Tirkiyê 9 ciwanên ji Rojhilatê Kurdistanê radestî çekdarên Eniya El Nusra kirine ku 22yê Tebaxa 2021ê ji aliyê polîsên Tirkiyê ve li Stenbolê hatibûn binçavkirin.
Malbatan xwestin li ber deriyê balyozxaneya Tirkiyê li aqûbeta zarokên xwe bipirsin, lê polîsên Îran nehiştin malbat nêzî balyozxaneyê bibin. Hat zanîn ku dema derketina balyozê Tirkiyê yê Tahranê jî polîsan êrîşî malbatên wan ciwanan kiriye.
Çend roj berê di raporên medyayî de hatibû ragihandin ku ew koma çekdar a bi ser Tirkiyê ve ji bo berdana 9 ciwanên di destê wan de ne, merc danîne û li beramberî berdana wan azadkirina girtiyên xwe ji destê rejîmê kirine.