Malbata şehîdên Komkujiya Cindirêsê daxuyaniyek belav kir û tê de ji Îtîlafê xwest helwesteke cidî li hemberî wan çekdaran bistîne ku di şeva Newrozê de 4 kes Kurd kuştin, ji ber ku agir vêxistibûn.
Di 20ê Adara 2023an de li bajarokê Cindêrisê yê ser bi Efrînê, çekdarên opozisyona Sûriyê yên girêdayî Tirkiyê gule li malbateke Kurd ku cejna Newrozê pîroz dikirin reşandin û di encamê de 3 bira û kurê yekî ji wan canê xwe ji dest dan û her wiha 3 kes jî birîndar bûn.
Malbata Pêşmerg, her wiha xwest kujer û grûpên ku piştgiriya wan dikin ji bo dadgeheke navdewletî werin radestkirin û werin muhasebekirin.
Di daxuyaniya Malbata Pêşmerg de hatiye xwestin ku çekdar ji gund û bajarên Efrînê derkevin û vegerine cihên xwe.
Malbata Pêşmerg xwest ku Efrîn ji aliyê hêzeke navdewletî ve were parastin.
Rêxistina Çavdêriya Mafên Mirovan (Human Rights Watch / HRW) jî derbarê şehîdkirina 4 sivîlên şeva Newrozê li Cindirêsê de bang li Tirkiyê kir ku lêpirsînê bide destpêkirin û dibêje pêwîst e Tirkiye piştevaniya xwe ya ji bo grûpên çekdar bidawî bîne.