Li navçeya Kifrî ya ser bi Silêmaniyê ve di bin xaniyekê de sînagogeke Cihûyan ku ji sedsala 19mîn maye hat dîtin. Sînagog ji ber ku ev demeke dirêj e hatiye paştguhkirin di bin metirsiya hilweşandinê de ye.
Rêveberê Dezgeha Şûnwarên Dîrokî ya Kifrî Ubeyd Mihemed ji Rûdawê re got, “Ev xanî yek ji girîngtirîn berhemên dîrokî yên Kifrî ye. Ew maala Dawid Zerîf ku yek ji kesayetiyên Cihû yên navdar ên herêmê ye.”
Ji ber metirsiyên ku wê demê rû bi rû man, Cihûyan xwe li vê malê vedişartin.
Mihemde diyar kir ku ev wek perestgeh jî dihat bikaranîn û wiha got: “Li qata jêrîn a xanî beşeke nû ya ku wek perestgeh dihat bikaranîn hat dîtin. Xanî 361 metre çarqoşe ye û ji çar ode û saloneke mezin pêk tê. Perestgeha li qata jêrîn bi mîmariyek pir balkêş hatiye avakirin. Heşt beşên hewastandinê yên cuda hene û germahiya di hundur de her weke 10 pileyan tê parastin.”
Foto: Bilind Tahîr / Rûdaw