Hêzên Asayîşa Silêmaniyî çend navendên "nêzikî PKKyê" girtin.
Li gorî medyaya nêzikê PKKyê, doh hêzên Asayîşa Silêmaniyê bi ser çend navendên çand, huner, rêxistin û medyayan de girtin.
Di encamê de bêyî biryara dadgehê ew navenda hatine girtin.
Her wiha çavkaniyeke ji Asayîşa Silêmaniyê li ser mijarê ji Rûdawê re got:
"Li gorî biryara Komîsyona Dadweriyê ya Îraqê, me çend navend û rêxistinên ku destûra wan a kar heta dawiya vê salê hebû û îro lîsansên wan bi dawî bûne girtin.
Girtina van navendan pêwîstî bi destûra dadwerekî din nîne, ji ber ku beriya niha me biryar ji Komîsyona Dadweriyê ya Îraqê wergirtiye û heta ku destûrnameya xwe li Bexdayê nû bikin dê bên girtin."
Li gorî zanyariyan, navendên Tevgera Jinên Azad, Kompanyaya Nûgar û Marziya û Kompanyaya Gizingî Berbeyanî ku ji bo Jin TVyê kar dike hatine girtin.
Kompanyaya Gizingî Berbeyaniyê li ser girtina kompanyayê daxûyaniyek belav kir û tê de wiha got:
"31ê Kanûna Paşîn, roja dawî ya salê, di çarçoveya biryareke ku Hikûmeta Navendî ya Îraqê, Hikûmeta Herêma Kurdistanê û Dezgeha Asayişa Herêma Silêmaniyê tê de beşdar in, bêyî hebûn û nîşandana nivîseke fermî û agahdarkirinê, biryara girtina Kompaniya Gizingî Berbeyaniyê hat dayîn.
Em biryara rawestandina karê xwe red dikin û qebûl nakin, tevî ku ev biryar ji aliyê dagirkerên Kurdistanê ve hatiye dan. Ev biryar binpêkirina azadiya rojnamevaniyê ye li Herêma Kurdistanê û nîşaneya hewla şikandina îradeya jin, nasnane û hebûna jinê ye."
Komîsyona Dadwerî ya Hilbijartinan a Îraqê bi tohmeta pêwendiya bi PKKyê re 6ê Tebaxa 2024an biryara hilweşandina Tevgera Azadî ya Civaka Kurdistanê, Partiya Azadiya Demokratîk a Êzidiyan û Partiya Cebheya Demokratîk dabû.
Li gorî xalên yekem û duyem ên madeya 25 a qanûn partiyên siyasî ya hejmar 36 a sala 2015an, nabe ti aliyekî siyasî bi partiyeke ne Îraqî ve girêdayî be û ji aliyê ti hêzeke derveyî Îraqê ve bê birêvebirin.