Beşdarên merasîma cenazeya Jîna Emînî li ber avahiya Qaymeqamiyeta Seqizê dest bi xwepêşandanekê kirin û li dijî desthilatdarên Îranê dirûşm gotin. Di navbera gel û hêzên ewlehiyê yên Îranê de alozî derket. Jîla Mostacer diyar kir ku di xwepêşandanê de bi êrîşa Hêzên Ewlehiyê yên Îranê 13 kes birîndar bûne û hejmarek kes hatrine girtin.
Endama Desteya Rêveber a Rêxistina Mafên Mirovan a Hengawê Jîla Mostacer beşdarî bultena Rûdawê bû li ser xwepêşandana ji bo Jîna Emînî axivî û got, “Îro li Seqizê di xwepêşandana ji bo Jîna Emînî de 13 kes birîndar bûn û çend kes jî hatin girtin.”
Welatiyeke Seqizî beşdarî bultena Rûdawê bû û got, “Mixabin di dawiya merasîma veşartina wê de, tevî ku hêzên ewlehiyê her der girtibûn jî, xelk ber bi Qaymeqamtiya Seqizê ve meşiyan lê rastî tundûtûjiyê û teqekirinê jî hatin, rewşa bajêr aloz e û xelk tên girtin.”
Hêzên ewlehiyê yên Îranê hewl didin bi çekan û gaza rondikrêj girseyê ji hev belav bikin.
Welatiya ku ji Rojhilatê Kurdistanê beşdarî bultena Rûdawê bû her wiha diyar kir, xelk û beşdarên merasîma veşartina Jîna Emînî bûne, daxwaz ji nûnera Seqizê yê li parlamentoyê dikin ku bersiva gel û hemû jinên Kurd û malbata Jîna Emînî bide.
Wê welatiyê destnîşan kir ku xelk daxwaza zelalkirina çawaniya rûdanê û delîlên qanûnî dikin û daxwaza rawestandina van tawanan dikin.