Di encama teqîna du otobusên leşkerî li bajarê Şamê û parêzgeha Humsê de, 2 leşker hat kuştin û hejmareke din jî birîndar bûn.
Ajansa fermî ya Sûriyê “SANA” li ser zarê jêderekî leşkerî belav kir, îro danê sibê li folka Cemarik a bajarê Şamê, bombeyek ku di otobuseke leşkerî de hatibû çandin, teqiya.
SANA diyar kir, di encama teqînê de, leşkerek hatiye kuştin û 11 leşkerên din jî birîndar bûne.
Ji aliyekî din ve, Rewangeha Sûrî ya Mafên Mirovan belav kir, otobuseke leşkerî li parêzgeha Humsê li ser riya Humis – Muhîn teqiya û di encamê de leşkerek hat kuştin û çend leşkerî jî birîndar bûn.
Diyar kir jî, ew kuştî û birîndar ji bo nexweşxaneya bajarokê Muhîn hatin veguhastin û hêzên rêjîma Sûriyê dorpêçeke ewlekarî li derdora nexweşxaneyê ferz kirin.
Roja 20ê Cotmeha borî jî, di encama teqandina otobuseke leşkerî li Şamê, 14 leşker ketibûn kuştin û hejmareke din jî birîndar bûbûn.