Hêzên ewlekarî yên Îranê li parêzgeha Sine ya Rojhilatê Kurdistanê, bêyî ti delîlan li mala mamostayê bi navê Mihemed Riza Mûradî lêgerîn kirin û ew girtin.
Dezgeha Mafê Mirovan a Hengawê ragihand, roja 14ê Hezîrana 2022an hêzên ewlehiyê yên Îranê bi ser mala endamê Desteya Rêveber a Encûmena Pîşeyî ya Mamosteyên Kurdistanê, şaxa Sineyê Mihemed Riza Mûradî de girtine û ew desteser kirine.
Dezgeha Mafê Mirovan a Hengawê her wiha destnîşan kir ku di destê hêzên ewlehiyê de biryara dadgehê bo girtina Mihemed Riza Mûradî tune bûye û piştî lêgerîna mala wî dest danîne ser telefona wî û ya hevjîna wî.
Li gorî daxuyaniya Encûmena Hevahengiya Rêxistinên Pîşeyî yên Mamostayên Îranê, ev girtin hevdem e ligel greva giştî ya mamostayên Îranê û Rojhilatê Kurdistanê ku biryar e roja Pêncşemê were lidarxistin.
Encûmena Hevahengiya Rêxistinên Pîşeyî yên Mamostayên Îranê hefteya bihurî gotibû, “Eger hevkarên me bê şert û merc neyên berdan û daxwazên rewa yên mamostayên Îranî neyên cîbicîkirin, wê xwepêşandanên pîşeyî berdewam bin.”
4 mamostayên din yên çalakvanên Rojhilatê Kurdistanê berî niha hatibûn girtin û heta niha nehatine berdan.
Ev demeke dirêj e mamostayên li Îranê û Rojhilatê Kurdistanê bi daxwaza azadkirina mamostayên girtî, zêdekirina mûçe, wekheviya mûçeya mamostayên xanenişîn ligel karmendên din ên hikûmetê, cîbicîkirina yasaya pilebilindiyê û fêrkirina zimanê Kurdî li dibistanan xwepêşandanan dikin.
Rûdaw