Li navçeya Nisêbînê ser bi parêzgeha Mêrdînê ya Bakurê Kurdistanê di navbera welatiyan û karmendên DEDAŞê ku dixwestin jimêrekên elektrîkê derxînin ser stûnan de alozî derket û di encamê de 7 welatî hatin desteserkirin.
Li gor dîmenên ku di medya civakî de hatine belavkirin li navçeya Nisêbînê karmendên Kompanya Dabeşkirina Elektrîkê ya Dîcle (DEDAŞ) xwestin jimêrekên elektrîkê ji malan derxînin û li ser stûnan girê bidin lê welatiyan rê neda karmendan û di navbera wan de alozî derket.
Di dîmenan de tê dîtin ku polîsan 7 welatiyên rê nedane karmendên DEDAŞê desteser kirine û nîştecihên taxê jî li beramber vê yekê nerazîbûn pêşan dane.
Herwiha li gor agahiyên hatine belavkirin alozî berdewam e.
Berî çend rojan li navçeya Cizîrê ser bi parêzgeha Şirnexê jî bi heman awayî di navbera welatiyan û karmendên DEDAŞê alozî derketibû.