Di encama topbarana artêşa Tirkiyê ya li li ser gundê Qeremaxê yê Kobaniyê zarokekî 4 salî lingê xwe ji dest da.
Di topabarana artêşa Tirkiyê ya li ser gundê Qeremaxê Kobaniyê de, zarokê bi navê Ebdo yê 4 salî lingê xwe ji dest da û di navbera roj û şevekî de, biçûktirîn mafê xwe weku zarok ji dest da.
Mistefa bavê Ebdo ye bi lez lawê xwe radike nexweşxaneyê, firmêsk û hêstirên çavan, êşa hinavên wî der tîne.
Bavê zarokê birîndar Mistefa Henîfî got “Em li mala xwe rûniştîbûn, dengê mûşekê hat, min ji kurê xwe re got here hundir ez ê binerim çi çêbûye, hema du gavan ez meşiyam, dengê bi dehan topan hat ez vegeriyam wiha li lawê min hatibû û derb lê ketibû.”
Ebdo ji ber rewşa wî ya ne cîgir, di beşê çavdêriya giran a Nexweşxaneyê Kobanê de tê dermankirin. Bijîşkê ku serperştiya neştergiriyê kiriye tekez dike ku Ebdo ji qonaxa metirsîdar derbas bûye û dê di heyama çend rojan ji nexweşxaneyê derbiçe.
Şarezayên nexweşiyên hundirîn û hestî Dr.Ehmed El Mele got “Damarên wî hemî têkçûbûn, lingê wî li ser çermekî mabû, cûreya xwîna wî A+ bû, lê me cûreya xwînê O- dayê piçekî baş bû û me ling jêre jêkir ji bo parastina jiyana wî. Di nava 3 - 4 mehên bê de dikare lingeke çêkirî siwar ke, lê wê hindekî bikule.”
Şemiyê 08/01/2022 artêşa Tirkiyê gundewar û nava bajarê Kobanî topbaran kir û di encama topbaranê de kesekî canê xwe ji dest da,12 kesên din jî birîndar bûn.
Ji îlona sala 2021an ve Tirkiyê liv û bizava xwe li eniyên şer yên Kobanî û Til Temirê pirtir kiriye. Hêzên Sûriya Demokratîk (HSD) jî her gav radigihîne ku ew bê bersiv namînin û berevaniyê di ber deverê xwe de bikin.
Rudaw