Li gundekî Kerkûkê di encama barîna baraneke xurt û hilweşîna malekê de, dayikek û kurekî canê xwe ji dest dan.
Berdevkê Polîsa Kerkûkê Amir Şiwanî îro 9ê Adara 2023an ji K24ê re ragihand, li gundê Baciwanê yê ser bi parêzgeha Kerkûkê ve, ji ber barîna baraneke xurt xaniyekî ji heriyê hilweşiya û di encamê de dayik û kurekî wê canê xwe ji dest dan.
Amir Şiwanî da zanîn jî, ji ber barana zêde li gundê Baciwanê lehî rabûye û metirsiya hilweşandina çend xaniyên din jî heye.
Ji duhî êvarê ve baraneke xurt li çend navçeyên Kurdistanê dibare. Bi armanca parastina canê xwendekar, mamoste û karmendan jî, îro li hin navçeyên li dibistanan betlane hate ragihand.
Rêveberiya Giştî ya Perwerdeya Silêmaniyê bi daxuyaniyekê ragihand, ji bo selametiya xwendekar, mamoste û karmendan, îro Pêncşemê 9.3.2023 li hemû navendên perwerdeyê yên giştî û taybet dê betlaneya fermî be.
Ji aliyê xwe ve jî Rêveberiya Giştî ya Helebce û Germiyan îro li hemû dibistanan betlaneya fermî ragihandin.
Li gorî pêşbîniya keşûhewayê, pêla baranê ku Herêma Kurdistanê girtiye, dê îro bandora wê li ser çend navçeyên Herêma Kurdistanê hebe.
K24