Li navçeya Geverê ya ser bi parêzgeha Colemêrgê ya Bakurê Kurdistanê bi sedan xelk ji ber bihabûnên elektirîkê û pêdiviyên sereke yên jiyanê daketin kolanan û xwepêşandan kirin. Xwepêşanderan dirûşmên “bila kompanyaya belavkirina elektirîkê VEDAŞ dest ji kar berde” bilindkirin û herwiha gotin ku ew kompanya xelkê dişelîne.
Li navçeya Gever a Colemêrgê îro 5ê sibata 2022ê bi sedan xelk daketin kolanan û bihayên zêde yên elektirîkê û pêdiviyên sereke yên jiyanê prostesto kirin.
Xwepêşander heta ber derê Kompanyaya Belavkirina Elektirîkê ya Gola Wanê (VEDAŞ) meşiyan û li wir bi dirûşm û çepikan çalakiya xwe berdewam kirin.
Xwepêşanderan di dirûşmên xwe de diyarkirin ku kompanyya belavkirina elektirîkê VEDAŞ xelkê dişelîne û bang li wê kompanyayê kirin ku dest ji kar berde.
Roja înê 4ê sibata 2022ê li navçeya Bazîdê ya ser bi parêzgeha Agirî jî bi ji ber bihayên zêde yên gaza xwezayî û elektirîkê bi hezaran xelk daketibûn kolanan û xwepêşandan kiribûn.
Ev di demekê de ye Serokkomarê Tirkiyê Recep Tayip Erdogan di dema vegera xwe ya ji Ukraynayê de di bersiva xwe ya li ser pirseke derbarê gaza xwezayî de got: ”Niha weke Tirkiye ti pirsgirêka me ya gaza xwezayî nîne. Kesên ku wiha nîşan didin di vî warî de pirsgirêkên me hene, tenê di vê zivistanê de derûnûya welatiyên me xirab dikin.”
Partiyên opozîsyona Tirkiyê derbarê bihakirina gaza xwezayî û elektirîkê berdewam rexneyan li desthilatê digirin û bi gotina wan êdî desthilat nikare welat birêvebibe.