Şeva borî li hin bajarên Îran û Rojhilatê Kurdistanê xwepêşandan berdewam bûn. Ciwanên Tehranê ragihandin ku wê roja Şemiyê piştî nîvro xwepêşandaneke giştî were lidarxistin.
Şeva borî li Tehran, Yezd, Zahidan, Ehwaz, Tewrêz, Urmiye, Seqiz û Bokanê welatiyan bi şêweyên cuda xwepêşandan kirin.
27mîn roja xwepêşandanan di demekê de hat ku hikûmetê gihandina înternetê bi tundî sînordar kir û tedbîrên ewlehiyê tundtir kir.
Li gor agahiyên ji çavkaniyên herêmî, polîsên Sineyê ji şofêrên ku di van rojên dawî da bi horna otomobîlan piştgiriya xwepêşandanan da, soz wergirtin û ji wan re gotin ku di xwepêşandanan da dernekevin kolanan.
Îro 28 roj in li Îranê û Rojhilatê Kurdistanê ji ber kuştina keça Kurd a xelkê Seqizê, Jîna Emînî ku ji aliyê polîsên exlaqî yên Tehranê ve xwepêşandan têne kirin.
Rêxistina Lêborîna Navdewletî (Amnesty International) roja Pêncşemê raportek li ser kuştina xwepêşanderan li Îran û Rojhilatê Kurdistanê belav kir. Li gorî vê raporê, heta niha 144 xwepêşander hatine kuştin ku 23 ji wan zarok in.