Li navçeya Geverê ya ser bi Colemêrgê ya Bakurê Kurdistanê ve biryar bû di 28ê Mijdarê de meşek ji navenda bajêr ber bi sînor ve bi navnîşana ji “şer û dagirkirinê re na” were lidarxistin. Parêzgariya Colemêrgî bo rêgiriyê li vê meşê bike, li hinek cihên bajêr hatinûçûnî sînordarkirin û kombûn wê werin qedexekirin.
Cîbicîkirina vê qedexeyê jî 27ê Mijdarê demjimêr 8:00 despêdike heta 28ê Mijdarê demjimêr 20:00ê.
Derbarê vê meşa ku biryarbû bi slogana “Ji şer û dagirkirinê re na” di 28ê mijdarê de li Geverê were li darxistin de Parêzgariya Colemêrgê daxwiyaniyek da û di vê daxwiyaniya xwe de dibêje:
"Ji bo pêkanîna nîzam û ewlekariya giştî di nav sînorên parêzgehê de, bo dabînkirina ewlekariya can û mal, parêzbendiya kes, ewlekariya dever û aramiya xelkê, ji derveyî çalakiyên ku parêzgarî û qeymeqamtî guncaw dibînin, li gor xala 19ê ya yasaya civîn û xwepêşandanan hejmara 2911 biyara qedexekirina ketin û derketinê bo hin cihên parêzgehê ji bo kesên ku goman li wan tê kirin ku wê tevlîheviyê bikin hatiye dayîn. Ji 27ê Mijdarê demjimêr 08:00 heta 28ê Mijdarê demjimêr 20:00 ev qedexe wê berdewam bike, bo kombûn û çûnûhatina otomobîlan di nav sînorên Colemêrgê de ku navend bajar û navçeyan digre nav xwe bên qedexe kirin,bo dema 36 demjimêran.”