Li gor lêkolînekê di sala 2021ê de ji her 3 ciwanan yekê wan ji paşeroja Tirkiyê bêhêvî ne û ji sîyaseta klasîk dûr in.
Şaxa Tirkiyê ya Komeleya Konrad-Adenauer-Stiftung lêkolîna xwe ya di navbera 20ê Gulan û 10ê Ilona 2021ê bi navê “Lêkolîna Ciwanan a Tirkiyê 2021ê” eşkere kir.
Rapirsî li 28 parêzgehan ligel 3 hezar û 243 ciwanên temênê wan di navbera 18 û 25 salî de ye û ji wan re tê gotin nifşê Z hatiye kirin. Li gor amarên rapirsiyê ji her 3 ciwanan yek ji wan ji Tirkiyê bêhêvî ne û ji sedî 72.9ê wan gotine eger derfet hebe dixwazin li welatekî din bijîn û herî zêde welatê ku dixwazin lê bijîn Almanya ye. Herwiha beşek ji ciwanan jî gotine xwezî rewşa Tirkiyê baş bibe û neçar nebim biçim welatekî din.
Li gor amarên lêkolînê ji %62.8 ciwan paşeroja Tirkiyê baş nabînin û rêjeya ciwanên ku bi giştî bêhêvî ne ji %35.2 ye. Wek sedema bêhêvî bûnê jî rewşa aborî, bihabûna jiyanê, enflasyon, bêkarî û tirsa egera krizeke aborî ya mezintir hatine diyar kirin.
Di rapirsiyê de tê gotin ji %3,7 ciwan ji siyasetmedaran, ji %4.4 ji partiyên siyasî û ji %6.9 ji rojnamevanan bawer nakin û herî zêde baweriya xwe bi hêza artêşê (%61.8) û kesên zanist (%70.3) tên.
Li gor amarên fermî yên dawî li Tirkiyê hejmara ciwanên ku temenê wan di navbera 15 û 24 salî de ye gihîştiye 12 milyon û 893 hezar û 750 kesî û ev jî ji %15.4 yê nifûsa giştî ye.
Li gor amarên herî dawî yên Saziya Amaran a Tirkiyê (TUIK) ji %20.8 ciwan yanî ji her 5 ciwanan yek ji wan bêkar e. Li Tirkiye û Bakurê Kurdistanê di hilbijartina 2023ê de nêzîka 5 milyon ciwan dê cara yekemîn dengê xwe bikarbînin.