Şevê din li demjimêr 01:00ê bi moşekan êrîşî Hewlêrê hat kirin ku hinek ji moşekan li nêzîkî cihên niştecihbûnê ketin û ziyanên madî çêbûn. Hat zanîn ku armanca êrîşa moşekî Balyozaxneya Amerîka û Balafirgeha Hewlêrê bûye ku yek ji moşekan li avahiya Kurdistan24ê jî ketiye û ziyaneke madî tê de çêbûye.
Dije Terora Herêma Kurdistanê ragihand, ji derveyî sînorên Herêma Kurdistan û Iraqê bi moşekên balîstîkî êrîşî Hewlêrê hatiye kirin.
Di daxuyaniya Dije Terora Herêma Kurdistanê de hat gotin: “Li gorî zanyariyan demjimêr 01:00ê şevê bi 12 moşekên balîstîkî Konsulxaneya Amerîkayê ya li Hewlêrê hatiye armanckirin.”
Dije Teror da zanîn ku ji bilî ziyana maddî ti ziyaneke canî çênebûye û diyar kir: “Li gorî zanyariyan moşek ji derveyî sînorên Iraq û Herêma Kurdistanê, ji rojhilat ve hatine avêtin.”
Wezareta Navxwe ya Herêma Kurdistanê jî derbarê êrîşê de ragihand: “12 moşekên Balistîk ji derveyî sînorên Îraq û Herêma Kurdistanê ve ji aliyê Rojhilat ve arasteyî avahiya Konsûlxaneya Amerîka li Hewlêrê, navçeya nîştecîbûna sivîlan li nêzîk barageha kanala Kurdistan 24ê û dedora wê hatine kirin.”
Wezareta Navxwe ya Herêma Kurdistanê diyar kir, di encamê de ziyana madî li avahî û xaniyên wê deverê ketiye, lê ti ziyanên canî çênebûne.
Wezareta Navxwe ya herêma Kurdistanê got, ew wê êrîşa tirsenokane şermezar dikin û welatiyên paytext û xelkê Kurdistanê piştrast dikin ku Hewlêr aram e û bi aramî dimîne.