Di bombebaraneke Îsraîlê de bo ser Balafirgeha Navdewletî ya Şamê, 5 serbazên Sûriyê hatin kuştin.
Ajansa fermî ya hikûmeta Sûriyê SANA ragihand, derengê şeva borî, Îsraîlê êrîşên mûşekî li dijî Balafirgeha Navdewletî ya Şamê û çend xalên başûrê Şamê li dijî sîstema berevanî ya esmanî ya Sûriyê encam dan.
Herwiha eşkere kiriye, Sûriye kariye beşek ji wan mûşekên Îsraîlê pûç bike û di encama êrîşên esmanî de pênc serbazên Sûriyê hatin kuştin û ziyanên maddî li cihê bombebaranê ketine.
Derbarê bombebarana Îsraîlê de, Rewangeha Sûrî bo Mafên Mirovan ragihand, Îsraîlê kêlgehên El Xesûle yên li nêzîkî Balafirgeha Şamê û navçeya El Kîswa ya li derdora Şamê bombebaran kiriye, ku milîsên Îranî tê de cîgir bûn. Di encamê de heft milîs hatin kuştin ku pênc ji wan Sûrî bûn û du milîsên din Îranî bûn.
Îsal ev 25emîn car e ku Îsraîl êrîşên mûşekî li nav axa Sûriyê ecam dide.