Heyeta Partîya Welatparêzên Kurdistanê ( PWK) Li Stenbolê Seredana Weqfa Îsmaîl Beşîkçî(ÎBV) Kir
Heyeteke Partîya Welatparêzên Kurdistanê ( PWK) ku ji Nûnerê PWKyê yê Stenbolê Cengîz Gungor û rêvebirên PWKyê pêk hatibû, roja şemîyê, 09.12.2023yê, li Stenbolê seredana Weqfa Îsmaîl Beşîkçî( ÎBV) kirin.
Mamosteyê hêja Îsmaîl Beşîkçî û Serokê ÎBVyê Îbrahîm Gurbuz pêşewazîya heyeta PWKyê kirin.
Heyeta PWKyê ji ber vê pêşewazîyê spasîya Mamoste Îsmaîl Beşîkçî û Îbrahîm Gurbuz kir.
Heyeta PWKyê di derbarê kongreya yekitîyê ya PAK û TDK-TEVGERê û avakirina Partîya Welatparêzên Kurdistanê ( PWK) û di derbarê bîr û bawerî û bernameya PWKyê de agahdarî dan.
Mamoste Îsmaîl Beşîkçî û Îbrahîm Gurbuz bi awayekî erênî pêşewazîya avabûna PWKyê û xebata li ser sîyaseta Kurdistanî kirin.
Mamoste Îsmaîl Beşîkçî bi taybetî bal kişand ser axaftin û fêrbûna zimanê kurdî û got "Divê Kurd di nava xwe de bi kurdî biaxivin. Bi taybetî jî berpirsiyarîke mezin dikeve ser milên dayikên Kurd".
Îbrahîm Gurbuz jî girîngîya pêşde xistina hişmendîya neteweyî anî zimên û bal kişand ser pêwîstîya perwerde û fêrbûna kurdî, dîrok û erdnîgarîya Kurdistanê.
Hevdîtina heyeta PWKyê ya li gel Mamoste Îsmaîl Beşîkçî û Îbrahîm Gurbuz di atmosfereke berhemdar û dostane de derbas bû.
09.12.2023
Buroya Ragehandinê ya Partîya Welatparêzên Kurdistanê ( PWK)