Roja 25ê Adara 2022yê heyeta hevbeş a PAK, PSK, TDK-TEVGERê, ku ji Serokê Giştî yê PSKyê Mesûd Tek, Cîhgirê Serokê Giştî yê PAKê Vahît Aba û Berdevkê TDK-TEVGERê Yûsûf Aydin pêkhatibû, li Amedê seredana Partîya Demokrat a Kurd(PDK) kir.
Serokê PDKyê Reşît Akici û rêvebirên PDKyê Suheyla Bingol, Hasan Yapmaz, M. Sukru Aslan, Ramazan Esenkuş û Nayif Aslan pêşewazîya heyeta hevbeş a PAK, PSK, TDK-TEVGERê kirin.
Li gorî agahdarîyên ku Rûpela Nû ji Cîhgirê Serokê Giştî yê PAKê Vahît Aba wergirtine, heyeta hevbeş resnivîsa Bernameya Daxwazên Acîl ya li jêr navê “Ji bo Rê Li Ber Çareseriya Pirsa Kurd û Kurdistanê Vebe, Werin Em Li Ser Daxwazên Xwe Yên Acîl Hêza bikin Yek” pêşkêşî rêvebirên PDKyê kirîye. Vahît Aba dibêje me ji rêvebirên PDKyê re got: ‘’Piştî em pêşniyarî û fikrên we jî bigirin, em dixwazin bi potansîyela herî berfireh a kurdan re Alîyê Kurdî bê ava kirin’’.
Di derbarê helwesta PDKyê de jî Vahît Aba ev agahdarî da Rûpela Nû: ‘’Serokê PDKyê Reşit Akici jî ji bo vê seredanê spasîya heyeta hevbeş a PAK, PSK, TDK-TEVGERê kir û ji bo xebatên hevbeş xweşhalîya xwe eşkere kir. Reşît Akici got emê vê pêşniyarîya we di rêvebirîya partîya xwe de binirxînin’’.