Nûnerên rêxistina UNESCO îsal dibin mêvanên merasîma Newroza Sineya Rojhilatê Kurdistanê. Parêzgarê Sine jî dibêje, “Ev derfetek e ku Sine wek `Paytexta Newrozê` bê tomarkirin.”
Merasîmên taybet
Parêzarê Sine Îsmaîl Zarî Kuşa li ser mijarê ragihand, îsal bi boneya Newrozê 2 merasîmên taybet dê li Sine bên sazkirin û ev jî derfetek e ji bo nîşandana şiyana bajarê Sine.
Rêxistina Cîhanî ya Perwerdeyî, Zanistî û Çandî ya ser bi rêxistina Neteweyên Yekgirtî (UNESCO) ve sala 2020an Sine wek `Paytexta Muzîkê` destnîşan kiribû.
Bajarê dahênerê muzîkê
Cîgirê Şaredarê Sine ji bo karûbarên çandî û civakî Serkewt Necefî, li ser merasîmên Newrozê yên îsal ên li Sine, ragihand, “em dê balê bikişînin ser wê yekê bajarê Sine ku wek `bajarê dahênerê muzîkê` li cîhanê naskirî ye, merasîmên me dê bi girîngdana bi muzîk û folklora navçeyê birêve biçin.”
Merasîmên Newrozê li Îran û Rojhilatê Kurdistanê; roja 14ê vê mehê ji Tehranê destpê dikin û paşê li bajarên Hemedan û Kirmaşan berdewam dibin.
Bernameya Newrozê
Roja 17ê Adarê jî li bajarê Sine di çarçova karnavaleke mezin de merasîmeke taybet dê birêve biçe û li gor zanyariyên parêzgariya wî bajarê Rojhilatê Kurdistanê, nûnerên UNESCO jî dê tê de amade bin.
Li Akrêya ser bi Duhoka Başûrê Kurdistanê jî her sal merasîma Newrozê bi beşdariyeke zêde û coşeke mezin birêve diçe û her bi vê sedemê jî Akre wek `Paytexta Newrozê` tê binavkirin.
Her sal li her çar perçeyên Kurdistanê bi boneya Newrozê ahengên berfireh tên sazkirin û Newroz bi coşeke mezin tê pîrozkirin.
Çavkanî / Rudaw