Hat ragihandin ku îro 1ê Hezîranê şandeke Hevpeymaniya Navdewletî ya Dijî DAIŞê ya bi serokatiya Şêwirmendê Leşkerî yê Hêzên Hevpeymanan, serdana Wezareta Pêşmerge ya Kurdistanê kir û piştevaniya leşkerî ya ji bo hêzên Pêşmerge dubare kir.
Di hevdîtina ku li Dîwana Wezareta Pêşmerge hat kirin de, li ser hevahengiya zêdetir û pêşvebirina beşên Wezareta Pêşmerge, li gor rênimayên projeyasaya çaksazî û alîkariya şêwirmendên Hevpeymaniya Navdewletî yên li Herêma Kurdistanê, gotûbêj hate kirin.
Herwiha li ser pêngavên demên dawî yên Wezareta Pêşmerge di mijara çaksaziyan hêzan de, şanda serbazî ya Hevpeymanan ragihand: “Pêngavên Wezareta Pêşmerge di mijara çaksazî û yekgirtina beşek ji yekeyên cuda yên Pêşmerge de, cihê dilxweşiya hemûyan e.”
Şanda Hevpeymanan diyar kir, "Mijara çaksazî û yekgirtina beşek ji yekên cuda yên Pêşmerge pêngaveke girîng û pêwîst e ji bo siberoja hêzên Pêşmerge li Herêma Kurdistanê.”
Şêwirmendê Leşkerî yê Hêzên Hevpeymanan di proseya çaksazî û perwerde û rahênanan de alîkarî û piştevaniya xwe ji bo Wezareta Pêşmerge dubare kir.