Partîya Maf û Azadîyan (HAK-PAR) û Partiya Welatparêzên Kurdistanê (PWK), di roja 22yê Sibata 2026an de, di saet 15.00an de li Stenbolê bi minasebeta Roja Zimanê Dayikê ya Navneteweyî çalakiyeke hevbeş li dar xistin.
Ev bernameya ku li avahîya Teşkîlata Parêzgeha Stenbolê ya HAK-PARê pêk hat, ne tenê pîrozbahîyeke sembolîk bû; di heman demê de ji bo statû, parastin û geşepêdana zimanê kurdî zemînekî nirxandina siyasî û civakî pêşkêş kir.
Di destpêka çalakîyê de, Serokê Koordînasyona Parêzgehê ya HAK-PARê Hakan Yıldız bi kurdî axaftinek kir û bal kişand ser wê yekê ku zimanê dayikê yek ji hîmên hebûna miletekî ye. Hat dîyarkirin ku zimanê dayikê ne tenê amûreke ragihandinê ye; ew hilgirê hafizeya dîrokî, berdewamîya çandî û nasnameya kolektîf e. Di çalakîyê de, deqeyek rêzgirtin ji bo şehîdên Kurdistanê jî nîşan da ku têkoşîna zimên pêvajoyeke wiha ye ku bi berdêlên dîrokî ve hatiye hûnandin.
Endamê MYK ya PWKyê Kasim Ergun di axaftina xwe de qala paşxaneya dîrokî ya Roja Zimanê Dayikê ya Navneteweyî kir û diyar kir ku mafê zimên parçeyekî jêneveger ê mafên mirovan ên gerdûnî ye. Ergun bal kişand ser mijarên wekî perwerdehîya bi zimanê dayikê, fermîbûna zimanê kurdî, bikaranîna di qada giştî de û azadîya hilberîna çandî; destnîşan kir ku ev mijar ne tenê mijarên çandî ne, di heman demê de mijarên demokratîkbûnê ne. Di vê çarçoweyê de hat destnîşankirin ku naskirina mafê zimên nîşaneya nîzameke siyasî ya pirreng û wekhevparêz e.
Serokê Giştî yê HAK-PARê Düzgün Kaplan jî di axaftina xwe de dîyar kir ku kurdî yek ji hîmên sereke yên hebûna me ya wekî milet e û xwedîderketina li zimên berpirsiyarîyeke neteweyî ye. Nirxandina Duzgun Kaplan nîşan da ku parastina zimên ne tenê reflekeseke çandî ye; ew mijareke stratejîk e ku divê ligel hişmendîya siyasî, saziyîbûn û rêxistinbûna civakî were destgirtin. Kaplan her wiha li ser geşedanên rojane yên li Kurdistanê jî nirxandin kirin û bal kişand ser têkilîya dînamîkên siyasî yên herêmî û têkoşîna ziman û nasnameyê. Di vê çarçoveyê de hat gotin ku çareseriya demokratîk û aştiyane ya pirsgirêka kurd û mîsogeriya qanûnî ya mafê zimanê dayikê, pêvajoyên ku hevdu temam dikin in.
Di çalakiyê de rewşenbîr û siyasetmedarê kurd Abdulmecit Kapazan helbesteke kurdî xwend. Yek ji Serokên Giştî yên berê yên HAK-PARê Latif Epözdemir jî li ser dîrok û girîngiya Roja Zimanê Dayikê ya Navneteweyî, asîmîlasyon û neheqiya ku li zimanê kurdî tê kirin û girîngiya xwedîderketina kurdan li zimanê xwe axaftineke kurdî kir.
Ji bilî endamên HAK-PAR û PWKyê, Serokê Giştî yê KURDT-KAVê Mehmet Celal Baykara, Serokê Komeleya Pêşengên Kurd Ali Çeven û gelek siyasetmedar û rewşenbîrên kurd beşdarî çalakîyê bûn. Ev beşdarî ji ber ku nîşan da ku pêkhateyên cuda yên siyasî û sivîl dikarin li ser zemînekî hestiyar a hevbeş a zimanê dayikê bigihîjin hev, cîhê balê bû.
Ev çalakîya ku ji alîyê HAK-PAR û PWKyê ve bi hev re hat birêvebirin, dikare wekî nîşaneya lêgerîna diyalog, hevparî û gihîştina xalên hevbeş di nav tevgera sîyasî ya kurd de were nirxandin. Mijarên bingehîn ên wekî parastin û pêşvebirina zimanê dayikê, xwedî wê potansiyelê ne ku di navbera nêzîkatîyên siyasî yên cuda de zemînekî yekîtiyê ava bikin.
Ev çalakîya ku li Stenbolê pêk hat, nîşan da ku Roja Zimanê Dayikê ya Navneteweyî ne tenê bibîranîneke sembolîk e; ew beyana îradeyê û ramanê ye li ser statû, perwerdehî û xuyabûna zimanê kurdî di qada giştî de.
Bername di atmosfereke dostane û berhemdar de bi dawî bû û bi tekezîya hevbeş a ku divê têkoşîna zimanê dayikê li ser zemînekî demokratîk, aştîyane û rêxistinkirî berdewam bike, bi ser ket.
22.02.2026