Gundê Pakaran ê li navçeya Têkor a ser bi parêzgeha Qersê ya Bakurê Kurdistanê, dîroka avakirina vî gundî vedigere bo serdemên çaxê naverast û heta niha mazûvaniya çend şaristaniyên weke Moxol Bagratî Osmanî û Rûsan kiriye. Beşek ji bermayayên wan şaristaniyan heta niha jî li gund ser piyan mane. Geştiyar ji derve û navxweyî welat bo dîtina wan serdana gund dikin.
Geştiyar Harun Cengiz got “Havînan di tîmeh û tebaxê de gelek geştiyar serdana vê derê dikin. Ji Îtalya û Amerîkayê jî geştiyar tên û li vir belgefîlm jî tên çêkirin.”
Ev gund yekem cihê niştecihbûnê yê Xanedana Bagratî ye ku di navbera sedsalên 9 û 11ê de li deverên Qers, Erdexan, Wan û Artvînê hukumdarî kiriye. Ev dêr ji aliyê wê xanedaniyê ve hatiye avakirin, lê bi borîna demê jinavdiçe û di serdema Rûsan de careke din tê nûjenkirin.
Serokê Desteya Kolanê yê Aniyê û Mamosteyê Zanîngehê Doç. Dr. Muhammet Arslan dibêje “Ev dêra hûn li pişt min dibînin sedsala 9emîn di serdema bagratiyan de hatiye avakirin. Lê resentiya xwe ne parastiye. Bi egerek mezin di dagîrkariya Rûsan a di sedsala 19emîn de hatiye nûjenkirin.”
Geştiyar ji dîtina gund kêfxweş in, lê xelkê gund dixwazin şûnwarên dîrokî yên gund bi temamî bên nûjenkirin daku zêdetir geştiyar serdana wî bikin.
Geştiyar Esra Bulanikoglu diyar kir “Bi nêrîna min ev der gelek xweş e û ez pêşniyar dikim ku herkes bê û serdana vir bike.”
Niştecihiyê Gund Hamit Çoban ragihand "Dîmeneke wî yê bê hempa heye,ez dixwazim ev der ji aliyê geştiyarî ve bê nirxandin. Bi rastî erdnîgariyeke bêhempa li vir heye ku xelk serdana wê bike û bibîne.”
Gundê Pakaran 35 kîlometreyan dûrî navçeya Têkorê li ser sînorê Ermenîstan û Bakurê Kurdistanê cih digire. Hejmara niştecihiyên wî 201 kes in. Li kêleka çemê Arpaçay bi dîroka xwe ya kevnar li benda geştiyaran e.
Rûdaw