Çekdarên opozîsyona Sûriyê yên bi artêşa Tirkiyê re herêma Efrînê dagîr kirine, bi armanca standina fidyê ji wan, 6 kes revandin.
Jêderekî ji Rêxistina Mafên Mirovan li Efrînê ji K24ê re ragihand, grûpa Polîsa Leşkerî roja 19/1/2022an 3 kes (Kemal Hebîb, Ehmed Hebîb û Idrîs Şeref) ji gundê Şadêrê revandin.
Diyar kir jî, çekdaran ew her kes bi tometa “leşkeriya neçar li cem YPGê kirine” tometbar kirin û piştî 300 – 500 Dolarê Amerîkî ji her yekî standin, ew roja roja 5/2/2022an berdan.
Wî jêderî got jî, çekdarên Feyleq El-Şamê kesek bi navê Mihyedîn Koco ji gundê Îska revand û heta niha çarenivîsa wî ne diyar e.
Heman jêderî da zanîn, grûpa Polîsa Leşkerî roja 27/1/2022an du kalemêr (Hesen Hemadê yê 75 salî û Ednan Îsmaîl Erebo yê 70 salî) revandin û heta niha çarenivîsa wan ne diyar e.
Çalakvanên Efrînê dibêjin, grûpên çekdaran bi armanca standina pere, fidye û bacan ji Kurdên Efrînê, wan hemûyan bi pêwendiya bi Rêveberiya Xweser re tometbar dikin.
K24