Rêxistina Mafên Mirovan-Efrîn ragihandiye, ji dema dagîrkirina Efrînê ve heta niha zêdetir ji 65 mamosteyên Kurd ji karê xwe hatine dûrxistin.
Zanyariyên ku ji aliyê Rêxistina Mafên Mirovan-Efrîn ve hatine ragihandin, diyar dikin ku ji 18 Adara 2018an ve heta niha, hêzên Tirkiyê û grûpên çekdar bêhtir ji 65 mamosteyên Kurd ji karê wan li dibistanên Herêma Efrînê dûr xistine.
Rêxistina Mafên Mirovan-Efrîn daye xuyakirin jî, hejmarek mamosteyên Kurd li Efrînê neçar bûne di jêr serdestiya grûpên çekdar ên girêdayî Tirkiyê de dest ji mamostetiyê berdin.
Li gorî heman zanyariyan, hêzên Tirkiyê û grûpên çekdar, li şûna mamosteyên Kurd ên xelkên Efrînê, kesên koçberên hawirdekirî danîne, ku gelek ji wan bawernameyên wan ên fermî jî nînin.
Di heman çarçoveyê de, hêzên Tirkiyê û grûpên çekdar, roja yekşema bihorî, perwerde li dibistana Narîn a Kurdên Êzîdî rawestandin, ew jî bi behaneya ku ew dibistan hizrên dijberî ola Îslamê belav dike.