Li çar aliyên dinyêi li Rojhilatê Kurdistanê û Îranê xwepêşandanên ji bo kuştina keça Kurd Jîna Emînî berdewam dikin û di 24 saetên borî de ji ber guleyên rasterast ên hêzên ewlehiya Îranê 10 xwepêşanderên Kurd li Rojhilatê Kurdistanê hatin kuştin û nêzîkî 50 kesên din jî birîndar bûn.
Li gor zanyariyan, îro 22.09.2022yê xwepêşanderan li piraniya bajarên Îran û Rojhilatê Kurdistanê xwepêşandan berdewam kirin û di 24 saetên borî de tene li bajarên Şino, Seqiz, Urmiye û Şaabad ên Rojhilatên Kurdistanê 10 xwepêşander hatin kuştin û zêdetir ji 50 xwepêşanderên din jî li bajarên din ên Rojhilatê Kurdistanê yên Sine, Bane, Pawe, Diwandere, Mehabad û hwd… birîndar bûn.
Herwiha hat ragihandin ku li piraniya bajarên Îranê jî bi taybet li Tehran, Rak û Tewrêzê xwepêşanderan êrîşî bi dehan banke û saziyên hikûmetê kirin û agir berdanê.
Hêzên ewlehiya Îranê ji ber weşandina xwepêşandanan û veguhestina deng û weşankirina xwepêşandanan gelek rojnamevan girtin.
Hat zanîn ku li piraniya bajarên Îran û Rojhilatê Kurdistanê xetên înternetê ji aliyê saziyên ewlehiya Îranê ve hatine birîn û cîhên ku înternet lê heye jî pir giran û kêm kar dike û sansoreke zêde li ser heye.