Lijneya Dadweriyê ya Hilbijartinan a Îraqê biryar da ku 5 kursiyên Parlamentoya Kurdistanê ji bo pêkhateyan bên veqetandin.
Biryar ji aliyê Lijneya Dadweriyê ya Hilbijartinan a Encûmena Bilind a Dadweriyê ya Îraqê ve hat wergirtin.
Li gorî vê biryarê dê li Silêmaniyê 2 kursî, li Hewlêrê 2 kursî û li Dihokê jî kursiyek ji bo pêkhateyan bin.
Li gorî agahiyên ku Berdevkê Komisyona Bilind a Serbixwe ya Hilbijartinan a Îraqê Cumane Xelay dane Rûdawê, dê dabeşkirina kursiyên pêkhateyan wiha be:
Silêmanî: Kursiyek ji bo Tirkmenan, kursiyek ji bo Mesîhiyan
Hewlêr: Kursiyek ji bo Tirkmenan, kursiyek ji bo Mesîhiyan
Dihok: Kursiyek ji bo Ermanan
Berê Parlamentoya Kurdistanê ji 111 kursiyan pêk dihat û 5 kursî ji bo Tirkmenan, 5 kursî ji bo Mesîhiyan û kursiyek jî bo Ermanan bû.
Dadgeha Bilind a Federal a Îraqê 22yê Sibatê 11 kursiyên kota yên pêkhateyan betal kiribûn û hejmara kursiyên Parlamentoya Kurdistanê daxistibû 100î.