Li gorî rapora Rêxistina Avakirina Aştiyê ya Navneteweyî (CPT) di şerê artêşa Tirkiye û PKKê yê nav axa Herêma Kurdistanê de, ji xeynî mirina bi sedan kesan 600 gund vala bûne ku li nav sînorên parêzgeha Duhokê û Hewlêrê ne.
Biryarderê Komîteya Navxwe, Ewlehî û Encûmena Xwecihî ya Parlamentoya Kurdistanê Hîkmet Mihemed ragihandiye, "Ji ber vî şerî bi sedan gund li parêzgehên Duhok û Hewlêrê vala bûne û ziyaneke mezin a darayî û canî gihîştiye xelkê Herêma Kurdistanê. Herwiha çend gundên Xirîstiyanan jî vala bûne.”
Li gorî amaran; li parêzgeha Duhokê 380 gund vala bûne ku ji wan 250 gund li navçeya Amêdiyê, 47 gund li Zaxoyê, 24 gund li Akrê ne. Dîsa di navbera salên 2018-2022an de jî 30 gund vala bûne û 8 gund jî di navbera salên 2021-2022an de ji ber şerê PKK û Tirkiyê vala bûne.
Li parêzgeha Hewlêrê jî di nav 30 salên borî de 212 gund ji ber şerê Tirkiyê û PKKê vala bûne ku 118 gund li Biradost, 65 gund li Barzan, 24 gund li devera Balekayetî û 5 gund jî li Rewandizê ne.
Beriya niha Komîteya Lêkolînê ya Parlamentoya Kurdistanê jî ragihandibû ku Tirkiye 15 kîlometreyan hatiye nav axa Herêma Kurdistanê û zêdetirî 500 gund jî vala bûne.