Berdevkê Hikûmeta Herêma Kurdistanê Cotyar Adil bi daxuyanikê diyar kir, li ser erka Serokwezîrê Herêma Kurdistanê, cenazeyê 16 qurbaniyên ku di Kenala Îngilîz de xeniqîne, wê ji bo Hewlêrê bêne vegerandin.
Roja 24ê Mijdara borî belema koçberan di Kanala Îngilîz (deryaya navbera Fransa û Brîtanayê) de binav bû û tê de hejmarek ji koçberên Kurd xeniqîbûn û aliyên pêwendîdar ên Herêma Kurdistanê bi aliyên Fransayê ji bo naskirina nasnameya koçberên Kurd di pêwendiyan de bûn.
Berdevkê Hikûmeta Herêma Kurdistanê Cotyar Adil di daxuyaniyeka de eşkere kir, li ser erka Serokwezîrê Herêma Kurdistanê Mesrûr Barzanî, bi rêya Balafirxaneya Navdewletî ya Hewlêrê, wê roja Îniya bê 24/12/2021ê cenazeyê 16 qurbaniyên ku di Kenala Îngilîz de xeniqîne, ji bo Hewlêrê bêne vegerandin.
Vegerandina wan terman, ji ber proseya nasîn û piştrastkirina nasnameyên wê, dora mehekê dereng ket, ew jî bi hevahengiya nivîsgeha Serokwezîrê Herêma Kurdistanê, Wezareta Navxwe, Fermangeha Pêwendiyên Derve û Nûnertiya Hikûmeta Herêma Kurdistanê li Fransayê bi Wezareta Dad, Wezarata Navxwe, Polîs û tîmên lêkolînê yên Fransayê birêve çû.
Di daxuyaniyê de hat jî, Hikûmeta Herêma Kurdistanê ji bilî sersaxiya li malbatên qurbaniyan, daxwazê ji welatiyan dike ku nekevin dû bazirganên mirovan û bi riyên qaçax ji welat dernekevin.