Cenazeyên Yûsif Gulo, kur û neviyê wî, piştî merasîmeke berfireh li bajarê Qamişlo, hatin veşartin. Biraziyê Yûsif Gulo jî dibêje, “Em bang li hemû partiyên Kurd dikin, `werin me bibin yek`. Dijmin qetla Kurdan ji xwe re helal kiriye.”
Bi tevlîbûna bi hezaran welatiyan rê û resm li goristana Qamişlo birêve çû. Ev her sê qurbaniyên êrîşa bi dronan ya Tirkiyê ji malbata Gulo bûn.
Biraziyê Yûsif Gulo, Rêzan Gulo ku şêwirmendekî Hêzên Sûriya Demokratîk (HSD) ye dibêje peyv û gotarên mamê xwe tîne zimên û ji hêzên kurdî dixwaze yek dest bin li hember êrîşên Tirkiyê li ser Rojavayê Kurdistanê
Rêzan Gulo, Biraziyê Yûsif Gulo, dibêje, “Firokeyên bêfirokevan, tankên wan xelkê sivîl, pêkhate, zarok û pîran dikin armanc, û ew bêdeng in. Peyama min bo wan, gelê Rojava dikare axaftina xwe bêje. Em wek malbata Gulo bang li hemû partiyên Kurdî dikin, `werin em bibin yek` ku dijmin partiyan nas nake, dijmin qetla gelê Kurd ji xwe re helal kiriye.”
Li nava bajarê Qamişlo xem û xemgînî serwer bû û bi biryareke Rêveberiya Xweser ji ber qurbaniyên vê êrîşê behî û şînî pêk anî.
Rêveberiya Xweser radigihîne ew li hember gef û êrîşên Tirkiyê bê deng namînin û gazindan ji helwesta bêdeng ya civaka navdewletî dike ku pêwîst e niha tevbigere.
Telet Yûnis, Hevserokê Encûmena Cîbicîkar a Rêveberiya Xweser, dibêje, “Nêrîn û helwesta hêzên navnetewî, hêzên garantor Rûsya û Amerîka, divê bi erkên xwe rabin û rê li ber dewleta Tirk li ser xaka Sûriyê bigirin ku qetlîam li ser gelê me tên meşandin. Li beramber van êrişan berxwedan û xwedîderketina li xak û destkeftên xwe, bersiva gelê me.”
Di nava sê mehan de ev 7 car in Tirkiye bi dronan li Rojavayê Kurdistanê êrîş dike ku 3 li Qamişlo,2 li Kobanê û 2 êrîş li Til Temirê bûne.
Di encama van êrîşên Tirkiyê de derdora 20 kes bûne qurbanî.
Rûdaw