Partîya Welatparêzên Kurdistanê (PWK) bang li welatiyên kurd dike ku roja 16ê Adara 2025an, di saetên cuda de li Kurdistanê û Ewropayê, 5 deqîqeyan bêdeng bimînin û jenosîda Helebçeyê bi bîr bînin. Ev bang di çarçoveya 37emîn salvegera komkujiya ku di 16ê Adara 1988an de li bajarê Helebçeyê pêk hatî de tê kirin.
Li gorî bangê, dê li deverên cuda demên rêzgirtinê wiha bin:
- Li Ewropayê: Saet 08:55 - 09:00
- Li Amed û Hewlêrê: Saet 10:55 - 11:00
Di daxuyaniyê de tê gotin: "Kurdistaniyên hêja! Roja 16ê Adar a 2025ê, bi saeta Amed û Hewlêrê di saet 10.55ê de, bi saeta Ewropayê di saet 08.55ê de, em li her cîhekî ku lê ne, 5 deqîqeyan bêdeng rawestin û şehîdên Jenosîda Helebçeyê û hemû şehîdên xwe bi rêzdarî bibîrbînin!"
Tê zanîn ku di êrişa 16ê Adara 1988an de, rejîma Sedam Huseyn çekên kîmyewî li dijî bajarê Helebçeyê bi kar anîbû û di encamê de zêdetirî 5 hezar welatiyên sivîl hatibûn qetilkirin.