Balyozxaneya Amerîka li Şamê komkujiya şeva Newrozê li bajarokê Cindirêsê yê ser bi Efrînê ve şermezar dike û bang li rawestandina êrîşên li dijî sivîlan dike.
Balyozxaneya Amerîka li Şamê şeva borî tweetek derbarê komkujiya şeva Newrozê ya li Cindirêsê de belav kir û tê de ragihand: “Tundûtûjiya ku roja 20'ê Adarê li Cindirêsê hatiye kirin, aramiya Sûriyê dixe metirsiyê.”
Her wiha Balyozxaneya Amerîka li Şamê bang li hemû aliyan kir ku êrîşên li dijî sivîlan rawestînin û lêpirsînê derbarê vê komkujiyê de bikin.
Şeva 20ê Adara 2023an li bajarokê Cindirêsê yê ser bi herêma Efrînê ve, hejmarek ji çekdarên grûpa Ceyş El-Şerqiye ji ber vêxistina agirê Newrozê, gulle li malbateke Kurd a bi navê (Pêşmerg) reşandin û di encamê de 3 bira û kurê birayekî şehîd bûn û 2 kes jî birîndar bûn.
Piştî vê tawana hovane jî, karvedanên tund, nerazîbûn û xwepêşandanên berfireh li ser asta navxwe û derve derketin, tê de xwepêşanderan ev komkujî şermezar kirin, daxwaza dadgehkirina tawanbaran li dadgeheke navdewletî kirin, her wiha daxwaza derketina çekdaran ji nava gund û bajaran kirin û rêveberiya herêma Efrînê bo xelkê herêmê yê resen bê radestkirin.
Kurdistan24